رسالة مبارك لمرسى
السيد محمد مرسى / رئيس
الجمهورية
بعد التحية’
أرسل إليك من زنزانتى الحقيرة
هذه الرسالة .......أنصحك فيها أولا بنقلى لمستشفى عسكرى ! حتى تحمى نفسك من ذات
المصير ؟ ولا تتعجب فمن كان يتصور ما جرى لى وتكرار حدوثه معك ليس ببعيد !
نصيحتى الثانية لك أبعد
زوجتك وأولادك تماما عن الحياة السياسية ولا تمنحهم أى إمتيازات ولو صغيرة !
أراك تسير على نفس خطاى
الإقتصادية والسياسية ! ففيما كانت معارضة الأخوان من قبل ! فقد حرصت على تعميق
علاقتك بالسعودية والإبقاء على معاهدة السلام وعلاقتك بأمريكا طيبة !
كما لم تقترب من الضرائب
التصاعدية والحد الأدنى والأقصى للأجور وكبرت دماغك تماما كما كنت أفعل !
لقد أخطأت فى حدوتة ال
100 يوم ! أنا بدأت حكمى بخطة ال 1000 يوم ! الف يوم يعنى حوالى ثلاث سنوات ! وعقبال
ما خلصوا كانت الناس نسيت أنا وعدتهم بيه
!
أسعدنى جدا أنك (أديت)
طنطاوى وعنان كتف! ...طنطاوى غدر وأنقلب على و خاف يشيل الليلة !...وجايز أتفاهم
معاكم ! لكن الغدار لازم يتغدر بيه !
أنت عملت زيى لما كان أى
حد يفكر فى الكرسى ولو فى سره! كنت بأركنه
ودى إحتياطات أمن ضرورية .
أنت مزودها حبتين مع الإعلام
والصحفيين ! خليهم يتسلوا و أعمل اللى فى دماغك !
هو فى أكتر من الصحفى
اللى شتمنى ! أديته علقة سخنة .. وسبته ملط فى الصحرا ! والتانى اللى أتكلم عن صحتى !
حولته للمحاكم وطيرت النوم من عينيه شهور وليالى ! هو ده الشغل .
لكن حرام تغلق قناة
الفراعين !..دى الحاجة الوحيدة اللى بتضحكنى
وتخفف عنى السجن القذر ده ! والراجل ده مسخره !
أنصحك تزود فلوس قيادات
التليفزيون المصرى وهما يكملوا الشغل!ّ
لكن تحول الإعلاميين للتحقيق
وتمنع ظهورهم على الشاشة ! شاشة أية يا راجل و(ميكروكروم) أية ! هو فيه حد بيتفرج على التليفزيون المصرى
أصلا ! الشعب بعد الثورة وقبلها ! بيشوف علبة الكبريت اللى ولعت المنطقة كلها !
(الجزيرة).. ياراجل كبر دماغك ! أنت كده ها تقوم الشعب عليك تانى !
على فكرة نص الوزراء وقيادات
الداخلية ورجال الأعمال اللى بتاخدهم معاك فى السفر دول رجالتى وأصدقاء جمال !
بتفض إعتصامات بالقوة وبتعتقل
وبتعذب وتقتل فى السجون ! ما هو العادلى
كان بيعمل كده !ما كنش عاجبكم !ورفضتم قانون الطوارئ وبعدين قلتم أنه مذكور فى
القرأن !
الف باء سياسة أنك تفرج
عن المعتقلين فى أول حكمك !
لكن تفرج عن جزء وتسيب
الباقى !ما ينفعش .
عايز تعيد محاكمتى ؟ يبقى
تحاكم طنطاوى وعنان والمجلس العسكرى اللى قتل 300 متظاهر وتحاكم نفسك على قتل 16
جندى فى رفح و21 جندى من كام يوم أو تمنحنى قلادة النيل زيهم ونطلع كلنا براءة زى كل
ضباط الداخلية !
وبعدين أزاى تسيبوا
سوزان مراتى حرة طليقة كده ! دى هى سبب كل المصايب ! ضيعت شرفى العسكرى هى وأبن ال
... اللى كان عايز يبقى رئيس !
أديك أخذت قروض من
صندوق النقد ! الفرق أن فى عهدى مكانشى فيه أزمات عيش وبنزين وبوتاجاز والأسعار
عمرها ما أرتفعت كده !
لما أنا يا أخى مثل أعلى ليكوا فى الحكم لية بتبهدلونى !
أحساسى أنك طيب لكن متقيد
(بالجماعة ) ! ومش قادر تخالفهم لأنهم دعموك
وما زالوا !
لكن لو حصلت ثورة تانية
ما تغلطشى غلطتى وخد بعضك أنت و(الجماعة ) ! وطيران على السعودية من قاصرها .
والله الموفق .
والسلام عليكم ورحمة
الله .
محمد حسنى مبارك / رئيس
الجمهورية سابقا
صورة طبق الأصل
طارق عبد الفتاح
خبير إعلامى
tarekart64@hotmail.com
ليست هناك تعليقات:
إرسال تعليق