الكومبارس الحزين
وكأني مهزوم من غير حرب ....وكأني مهجور من غير حب وكأني شبعان من غير زاد ...وكأني ببكي من غير دمع ... وكأني بمثل دور لمهرج في السيرك ........وكأني بتحرك جو ديكور والخطوة محسوبة بدقة ......... والرقبة مربوطة في سلك وكأني تور متغمي بيدور من غير ساقية... وكأن الدنيا مش دنيا وكأني بضحك ..والضحكة مخنوقة في الحلق ... وكأني وحيد وسط الزحمة والخلق .....وبصرخ ومفيش حد ...وكأني عاطل رغم الشغل... وكأن حياتي هزار مش جد... وكأني دخلت السينما في نهاية الفيلم .....وكأن السيناريست والمونتير حذفوا مشاهدى والمخرج قال ستوب خلص الفيلم ....وكأني في حلم وأنا صاحي وكأني في موتي أنا ماشي .. .... وببكي وباخد بأيديا عزايا .... وكأن الأهل والناس مجاميع.... بيودعوا كومبارس بأمر المخرج وكأني في السما صاعد .......وكأني يا مؤمن علي أبواب السور العالي ضايع .....وكأني فقدت النطق .... وبدور علي أسمي ورسمي وبمسك بدواية الحبر وبخط أول حرف....و النور الغامر غطاني....وكأني بغني لكني بئن.......وفي صمتي كلام ... وكلامي أخرس بيرن .....وكأني وسط جنينة ماشي ...وكأني برقص وبمثل وبتكلم والعالم كله بيسمعني.. وكأني عايش رغم أني أتكفنت ...وكأني اخترت لكني عمري ما اخترت ... وكأنه الجبر....وكأني بقرة بتحش......وكأني طفل ....شكلي يغش . وكأني عصفور نزعوا منه الجناحين ...وسابوه في العش .. وكأني وكأني وكأني.....لكني عمري ما حسيت بكلمة في دوري المكتوب......ولأني عارف أن القصة معادة....والفيلم ممل ممل ممل.......ولأني مش فاهم ولا حابب الدور والقصة والفيلم..... لكني مش عارف ليه مضطر أكمل دوري وأفضل أزن.....وأمشي من مشهد للتاني وكأني بفن .!! مش عارف ليه مضطر أكمل دوري الناقص في الفيلم.....كومبارس حزين وسط المجاميع والمخرج جبار , كتب الأدوار, ورسم الأقدار... وكأني في نهاية تصوير مكدود منهار..... مستني كلمة ستوب , ستوب كلمة بيستناها الكومبارس بشوق وحنين , ستوب كلمة بتريح وبتنهي المشوار .
طارق عبد الفتاح
ليست هناك تعليقات:
إرسال تعليق